Lögreglan á Akranesi segir það mikla mildi að ekki hafi orðið dauðaslys þegar sprenging varð í bíl fyrir utan bæinn í fyrrinótt. Ungur maður í bílnum sviðnaði mikið í andliti og brann mikið á höndum. Sprengingin var svo öflug að bíllinn var í tætlum á eftir, hurðin farþegamegin rifnaði af og þeyttist tvo metra í burtu, afturrúðan fannst í 25 metra fjarlægð og raunar rifnaði afturhlutinn með ljósabúnaðinum frá bílnum, svo mikill var kraftur sprengingarinnar.

Tildrög slyssins voru þau að ungi maðurinn hugðist sniffa gas í bílnum og kveikti sér síðan í vindlingi með fyrrgreindum afleiðingum. Hann hringdi sjálfur í Neyðarlínuna á fjórða tímanum í fyrrinótt þar sem hann var staddur illa á sig kominn rétt við hesthúsahverfið á Æðarodda. Hann var fluttur með sjúkrabíl á SHA þar sem hann er enn rúmliggjandi. Líðan hans er eftir atvikum.