Frá Langasandi á Akranesi

Það sem af er júlímánuði hefur verið óvenjulega þurrt og úrkomulítið á Vesturlandi miðað við tölur hinnar gömlu veðurathugunarstöðvar í Stykkishólmi. Aðeins tvisvar áður frá upphafi veðurathugana í Hólminum hefur mælst jafnmikill hiti fyrstu 19 daga júlímánaðar, en það var árin 1880 og 1908, en meðalhitinn það sem af er júlí er 12,5 gráður. Úrkoman í júlímánuði í Stykkishólmi er aðeins 0,7 millimetri, í Reykjavík 5,4 mm, á Akureyri 3,9 mm og í Bolungarvík 3,3 mm.  Trausti Jónsson veðurfræðingur hjá Veðurstofu Íslands sagði í morgun að fara þyrfti talsvert aftur til að finna svo lága úrkomutölu í Hólminum fyrir nákvæmlega þetta þriggja vikna tímabil í júlí, en hins vegar sé það ekki afbrigðilegt að svona lítil úrkoma sé á tímabilum fyrri hluta sumars. Trausti segir að bæði meðalhiti og úrkomutölur kunni að breytast nú í vikunni þegar spáð er köldu norðan veðri í kjölfar lægðar sem tekur með sér kalt loft og raka.