24. september. 2009 05:49
Óskar Magnússon útgefandi Morgunblaðsins tilkynnti í dag að Davíð Oddsson og Haraldur Johannessen hefðu verið ráðnir ritstjórar Morgunblaðisins. Í yfirlýsingu vegna þessa segir að Davíð hafi skýra framtíðarsýn og rödd hans hafi ætíð náð eyrum þjóðarinnar. Haraldur Johannessen, sem er hagfræðingur frá Háskóla Íslands, komi til blaðsins úr ritstjórastóli Viðskiptablaðsins sem hann hafi stýrt af öryggi og fagmennsku. Árvakur vænti mikils af framlagi þessara öflugu einstaklinga sem raunar hafi báðir starfað áður hjá Morgunblaðinu, þó mislengi sé og á ólíkum tímum. Nú í dag var 40 af rúmlega 100 starfsmönnum Árvakurs sagt upp störfum og koma þeir úr öllum deildum fyrirtækisins. Þeirra á meðal var Þóru Kristínu Ásgeirsdóttur, formanni Blaðamannafélags Íslands sagt upp. Meðal þeirra breytinga sem gerðar verða má nefna að sunnudagsblaði Morgunblaðsins verður dreift með laugardagsblaðinu framvegis.
Ekki þarf að velkjast í vafa um að þessi tíðindi dagsins úr fjölmiðlaheiminum eru meðal þeirra stærstu undanfarin ár. Væntanlega kemur í ljós á næstu mánuðum hvort ákvörðunin boði nýja og betri tíma fyrir Morgunblaðið eða endalok þess. Skemmst er frá því að segja að allt er logandi á bloggheimum eftir þessi tíðindi og skiptast menn í tvær fylkingar sem ýmist eru himinlifandi eða orðlausir, fullar forundran yfir þeim breytingum sem boðaðar hafa verið á þessu tæplega tíræða málgagni hægri manna hér á landi. Hvað sem öðru líður þá þarf enginn að velkjast lengur í vafa um að óháðum fréttamiðlum hér á landi fækkaði um einn í dag.