10. desember. 2009 06:06
 |
Ingibjörg, Haraldur og Hafmeyjan. |
Haraldur Sturlaugsson á Akranesi keypti í dag styttuna Hafmeyjuna eftir Nínu Sæmundsson, sem reynt var að selja á uppboði Gallerís Foldar í fyrrakvöldi Ekki fékkst viðunandi lágmarksboð í verkið á uppboðinu og keypti Haraldur styttuna af innflytjanda hennar í dag. Hafmeyjunni hefur nú verið komið fyrir á stalli á sýningunni
Íþróttir í 100 ár sem opnuð var á Akranesi í síðustu viku. “Þar sem þessi fræga stytta virtist vera orðin munaðarlaus rann mér það til rifja. Sér í lagi þar sem listakonan Nína Sæmundsson var Fljótshlíðingur, fædd á næsta bæ við Hlíðarenda, í Nikulásarhúsum. Ég hef alltaf verið veikur fyrir konum úr Fljótshlíðinni og Hafmeyjan er meira að segja nokkrum sentimetrum stærri en hún Ingibjörg mín,” sagði Haraldur í gamansömum tóni þar sem hann var ásamt Ingibjörgu Pálmadóttur eiginkonu sinni að koma styttunni fyrir í sýningarhúsnæðinu við Stillholt á Akranesi síðdegis í dag.
“Innan tíðar ætla ég að samræma opnunartíma sýningarinnar við opnunartíma verslana hér á Akranesi. Hingað getur fólk því komið í rólegheitum, skoðað íþróttasýninguna, listaverkið og brugðið sér í búðir í miklu afslappaðra umhverfi en býðst annarsstaðar,” sagði Haraldur.
Sýningin Íþróttir í 100 ár verður opin um næstu helgi frá klukkan 13-18 en frá og með miðvikudeginum 16. desember verður hún opin daglega til jóla til kl. 22.
Eins og frægt er orðið var afsteypu af listaverkinu Hafmeyjunni komið fyrir í Reykjavíkurtjörn 1959 en var sprengd í loft upp ári síðar. Frummyndin hefur hins vegar verið í Kaliforníu í hálfa öld, en styttuna gerði Nína lýðveldisárið 1944 um svipað leiti og fyrsti Íslandsmeistaratitillinn í knattspyrnu kom á Skagann.