19. janúar. 2010 12:45
Reynir Jóhannsson, sem nú sér um strætisvagnaferðir innanbæjar á Akranesi, segir að með tilkomu Flatahverfisins í leiðakerfi bæjarins hafi farþegum fjölgað frá því sem þeir voru. Hann segist vera með 40 sæta rútu í ferðunum og það dugi varla til. Aðspurður segir hann því að það væri engan veginn nægjanlegt að hafa sömu stærð af strætisvagni og þann sem áður var í ferðum á Akranesi þegar Skagaverk sá um strætóferðirnar. Eins og fram kom í frétt í Skessuhorni í síðustu viku ber talsvert á óánægju fólks með að sérbúinn strætisvagn er ekki í ferðunum innanbæjar á Akranesi, eftir að skipt var um þjónustuaðila. Eldra fólk, yngstu börnin og fólk með barnavagna eigi t.d. erfitt með að nota bílinn. Í fréttinni kom einnig fram að Hópferðabílar Reynis hafi rétt eins og Skagaverk aðlögunartíma til að verða sér úti um nýjan bíl eftir að útboð var opnað.
Reynir sagði í samtali við Skessuhorn í morgun vera búinn að panta strætisvagn fyrir 50 farþega sem von sé á í aprílmánuði. Hann segir ekkert veita af þeirri stærð, en þessir bílar séu ekki gripnir upp með litlum fyrirvara. Vegna lesendabréfs um strætómál í síðasta blaði Skessuhorns sagði Reynir, að búið væri að koma til móts við þann farþega, enda vilji fyrirtækisins til að koma til móts við strætisvagnafarþega á Akranesi.