Algeng sjón inni í gagnaverum; skápar fullir af tækjum og hugbúnaði.

„Eigum við ekki að vera svolítið bjartsýn og vonast til að uppbygging annars gagnaversins í Hvalfjarðarsveitinni hefjist innan árs og byrjað verði á hinu innan þriggja ára,“ segir Jónas Tryggvason í samtali við Skessuhorn. Jónas er annar forsvarsmanna Titan Global sem um tíma hefur stefnt á uppbyggingu netþjónabús í Hvalfjarðarsveit. Þar eru tveir staðsetningarkostir sem horft er til, annars vegar við Stóru-Fellsöxl og hins vegar við Grundartanga á stórri iðnaðarlóð þar, en sjálft tekur gagnaverið 50 þúsund fermetra og því um plássfreka starfsemi að ræða.  Jónas segir að það sem hefði heft gang mála varðandi áform um uppbyggingu gagnavera í landinu sé að ekki er búið að ganga frá fjárfestingarsamningi við Verne Holding í Reykjanesbæ. Framvarp, sem sá samningur byggi á, líti ágætlega út og leggi grunninn að því skatta- og rekstrarlega umhverfi sem stjórnvöld ætli að veita þessari starfsemi á Íslandi.