12. febrúar. 2010 04:04
Framundan er hin heilaga þrenning daga sem hefst með bolludegi, síðan sprengidegi og endar svo á öskudegi. Þessir dagar hafa orðið hagyrðingum yrkisefni sem og fleiri dagar sem merktir eru ákveðnu þema. Hér fara á eftir fjórar vísur sem allar hafa þó sama upphafið. Gefum fyrst Hjálmari Freysteinssyni á Akureyri orðið:
Bollur skal éta á bolludaginn,
baunir og saltkjöt á sprengidaginn,
en iðrast hann má
maðurinn sá
sem át konuna sína á konudaginn.
Ólafur Halldórsson bætti við:
Bollur skal éta á bolludaginn,
baunir og saltkjöt á sprengidaginn,
en þótt hugur sé á
ekki húsfreyjan má
hafa bóndann í matinn á bóndadaginn.
Björn Ingólfsson spurði:
Ef bollur skal éta á bolludaginn
og baunir og saltkjöt á sprengidaginn,
Þá er mér spurn
spekingar: Hvurn
andskotann étiði á öskudaginn?
Og Kristján Eiríksson svaraði:
Ég bollurnar ét á bolludaginn
og baunir og saltkjöt á sprengidaginn,
svo fæ ég mér bjór
og byrja mitt þjór
og verð öskufullur á öskudaginn.