"Það er allt tilbúið og við eigum von á fyrsta loðnuaflanum í kvöld og bíðum bara eftir nánari tímasetningu þannig að hægt sé að boða mannskapinn til starfa. Við gerum ráð fyrir að um 30 manns vinni við loðnuhrognavinnsluna og frystinguna á sólarhring og sennilega verðum við með tvískiptar vaktir, a.m.k. til að byrja með,“ sagði Gunnar Hermannsson, vinnslustjóri í hrognavinnslu HB Granda á Akranesi á síðu fyrirtækisins í dag, en á Akranesi bíða menn nú spenntir eftir að annað hvort Ingunn AK eða Faxi RE komi með fyrsta aflann á loðnuvertíðinni. Ingunn og Faxi eru nú að loðnuveiðum úti af Garðskaga og það er því ekki langt að sigla. Að sögn Gunnars er óvíst hve mikil hrognafyllingin er í loðnunni sem fengist hefur síðasta sólarhringinn en hann segir þó að þroski hrognanna skipti meira máli en sjálf hrognafyllingin.