Krabbameinsfélagið í samvinnu við Stangaveiðifélag Reykjavíkur, Veiðihornið og Veiðikortið hefur kynnt fluguhnýtingarkeppni þar sem landsmenn geta sent inn tillögu að bestu silungsveiðiflugunni. Glæsileg verðlaun eru í boði fyrir þær flugur sem lenda í þremur efstu sætunum í tveimur flokkum; almennum flokki og unglingaflokki (16 ára og yngri). Meðal verðlauna má nefna veiðileyfi í Laxá í Laxárdal, flugustangir og fleira.  Dómnefnd mun ákveða hvaða flugur bera sigur úr býtum. Þær verða að vera hannaðar og hnýttar af þátttakendum, en keppnin er opin öllum. Unglingum er frjálst að taka þátt í almennum flokki en hver keppandi getur einungis keppt í einum flokki. Keppanda er frjálst að senda inn ótakmarkaðan fjölda flugna.