03. mars. 2010 09:04
Þegar Akranes var að byggjast upp sem öflugur útgerðar- og iðnaðarbær upp úr seinna stríði, voru talsverðir fólksflutningar þangað af landsbyggðinni. Mikið var um að fólk vestan að, bæði af Ströndum og Vestfjörðum, leitaði sér lífsviðurværis og framtíðarheimilis á Skipaskaga eins og hann var gjarnan nefndur í þá daga. Þangað fóru meira að segja allmargir Hornstrengingar. Meðal þeirra eru þau Kjartan Guðmundsson blikksmiður og kona hans Auður Elíasdóttir sem fluttu til Akraness árið 1958. Kjartan er fæddur og uppalinn á Búðum í Hlöðuvík og kom reyndar á Skagann með viðkomu í Keflavík og Reykjavík, en Auður er frá Þingeyri í Dýrafirði. Kjartan er nú á 87. aldursári, nýfluttur inn á dvalarheimilið Höfða en er enn við góða heilsu.
Allir íbúar - 500 talsins - fóru á 12 árum
Blaðamaður Skessuhorns heimsótti Kjartan nýlega og fékk að fræðast um sitthvað, mest um viðburðaríka tíma þegar hann var að alast upp, fyrst í Hlöðuvík og síðan í Aðalvík. Báðir eru þessir staðir í fyrrum Sléttuhreppi á Hornströndum sem náði frá Veiðileysisfirði og Hesteyri sunnan Aðalvíkur alveg norður í Horn í Hornvík. Um 1940 bjuggu og áttu lögheimili í Sléttuhreppi um 500 manns. Tólf árum síðar, á árinu 1952, fór síðasti ábúandinn úr hreppnum. Um árabil hafa einungis fjórfætlingar íslenski refurinn hafst við á Hornströndum, enda er friðland hans þar.
Sjá ítarlegt við tal við Kjartan Guðmundsson um uppvaxtarárin á Hornströndum, í Skessuhorni sem kemur út í dag.