27. ágúst. 2010 02:01
Um þessa helgi mæta 758 hreinræktaðir hundar af 82 hundakynjum í dóm á hundasýningu Hundaræktarfélags Íslands. Megintilgangur hundasýninga er að meta hundana út frá ræktunarmarkmiði hvers kyns og leiðbeina ræktendum þannig í starfi sínu. Sýningin verður haldin í Reiðhöllinni í Víðidal og hefjast dómar kl. 9.00 árdegis bæði laugardag og sunnudag og standa fram eftir degi. Fimm dómarar frá fjórum löndum, Íslandi, Bretlandi, Finnlandi og Króatíu dæma í fimm sýningarhringjum samtímis. Úrslit á sunnudegi hefjast milli 14:30 og 15:00 og kemur þá í ljós hvaða hundar bera af að mati dómara.
Öflugt barna- og unglingastarf er starfrækt innan félagsins og að þessu sinni taka 31 ungmenni þátt í keppni ungra sýnenda föstudaginn 27. ágúst sem hefst kl.18:00. Dómari í þeirri keppni er Erna Þorsteinsdóttir. Í anddyri reiðhallarinnar verða kynningarbásar um ólík hundakyn. Þar gefst gestum og gangandi kostur á að kynnast hundum og ræða við hundeigendur auk þess sem á staðnum verða fjöldinn allur af sölu- og kynningarbásum þar sem ýmis tilboð verða í gangi.