Fallinn er frá er einn öflugasti stuðningsmaður Skagaliðsins, Arnór Pétursson. Á yngri árum spilaði hann fyrir ÍA og var bráðefnilegur leikmaður, en eftir slys var hann bundinn við hjólastól. Það aftraði honum þó aldrei frá því að mæta á allflesta leiki Skagaliðsins síðustu áratugi og taka þátt í mörgum fræknum sigrum. Arnór var fylginn sér og hafði skoðanir á málum. Hann tók virkan þátt í réttindabaráttu fatlaðra og gaf hvergi eftir þegar sanngirni og réttlæti var annars vegar. Með sama áhuga og elju tók hann þátt í að styðja Skagaliðið og hafði þar margt gott og jákvætt fram að leggja. Það er skarð fyrir skildi við andlát Arnórs, en klárt að piltarnir í meistaraflokki munu heiðra minningu hans með því að ná þeim markmiðum sem upp hafa verið sett og koma félaginu okkar aftur í fremstu röð.