12. september. 2011 07:01
Trúlega hefur ekki öllu stærri hópar gengið á Akrafjall en nýverið þegar á þriðja hundrað manns var þar á ferðinni, nemendur og kennarar frá Menntaskólanum í Reykjavík. Fríður Halldórsdóttir íþróttakennari var meðal nokkurra tómstundakennara sem gekk með nemendum MR á fjallið, en alls taldi hópur nemenda 210. Fríða sagði í samtali við Skessuhorn að þetta hafi verið geysilega skemmtileg ferð og ekki hafi veðrið skemmt, um 16 gráðu hiti uppi á fjallinu, en sem betur fer smágola sem þerraði svita göngugarpanna. “Við fórum hringinn, fyrst var gengið á Geirmundartind og síðan yfir á Háahnúk. Við byrjuðum gönguna um klukkan hálftíu og þeir fyrstu voru komnir niður um hálfþrjú,” sagði Fríður.
Talsverð umferð var að rótum Akrafjalls um helgina og margir á fjallinu, enda nú einmitt aðal berjatíminn. Í gestabókina á Háahnjúki var skráð heil opna á sunnudeginum, en samt voru þeir fleiri sem gengu á Geirmundartind þann dag, að sögn eins göngugarpsins af mörgum sem fóru á fjallið.