28. september. 2011 03:01
Veitingahúsið Galito á Akranesi hefur lengi haft það orðspor að þar sé boðið upp á úrvals veitingar og góða þjónustu. Ekki alls fyrir löngu komu nýir eigendur að rekstri Galito, sem nú eins og áður er fjölskyldufyrirtæki í hjarta Akraness, í sama húsi og Ráðhús bæjarins. Á dögunum flutti Galito um set, tuttugu metra til vinstri, í suðurenda Stillholts 16-18 þar sem verslunin Módel var áður til húsa. Þar hefur nú verið innréttaður nýr og glæsilegur veislusalur ásamt allri aðstöðu til framleiðslu, eins og hún best getur orðið að sögn eigendanna. Það eru þau Hilmar Ólafsson matreiðslumaður og Guðrún Hjörleifsdóttir vöruhönnuður sem um síðustu áramót tóku alfarið við rekstri Galito og keyptu þá út fyrri eigendur og meðeigendur, Þórð Þrastarson og Áróru Rós. Hilmar hefur mikla reynslu í veisluþjónustu, er eigandi Fortuna veisluþjónustunnar, sem sameinuð var Galito fyrir rúmum tveimur árum.
“Það er einmitt þetta góða orðspor Galito sem hvatti okkur til að sækja fram og ráðast í þessa framkvæmd. Það er þessi stóri, góði og trausti viðskiptahópur sem gerði okkur þetta kleift. Við höfum líka mjög gott starfsfólk sem heldur betur hefur komið sér vel núna undanfarið við flutninginn yfir á nýja staðinn. Við erum einnig mjög þakklát iðnaðarmönnunum sem innréttuðu og gerðu húsnæðið svona glæsilega úr garði,” segir Hilmar, en þess má geta að Guðrún meðeigandi og sambýliskona Hilmars kom að hönnun salar og snyrtinga ásamt Valey Benediktsdóttur innanhússarkitekt.
Nýr Galito er í 299 fermetra húsnæði, um 100 fermetrum stærra plássi en gamli veitingastaðurinn var í. Salurinn tekur um 100 manns í sæti og Hilmar segir að við hönnun veitingahússins hafi verið stílað upp á hámarksafköst, í veisluþjónustu út í bæ, í sal og einnig í framleiðslu á pizzum. Allt á sama tíma.
“Við setjum markið hátt og erum ákveðin í að standa okkur ekki síður vel en Galito er þekktur fyrir hingað til. Að auki erum við komin með mjög góða kaffivél og hágæða kaffi. Áður en langt um líður ætlum við líka að bjóða upp á góðan miðdegismatseðil. Þannig munum við líka uppfylla þá þörf sem er fyrir góðu kaffihúsi á Akranesi,” segir Hilmar Ólafsson í Galito.