Markamaskínan Hjörtur Júlíus Hjartarson átti í sumar eitt sitt albesta tímabil á ferlinum, þótt kominn sé á 37. aldursár, skoraði 15 mörk og var langmarkahæsti maður ÍA liðsins í fótbolta, en næstur kom Gary Martin með níu mörk. Hjörtur sem skorað hefur fjölda marka fyrir ÍA og fleiri lið á ferlinum hefur ákveðið fyrir nokkru að spila ekki meira með liði í efstu deild. Hann geti það einfaldlega ekki vinnu sinnar vegna, en hann er íþróttafréttamaður hjá RUV og fer m.a. líklega á Ólympíuleikana í London næsta sumar. Hjörtur segir að það sé afskaplega erfitt að hætta að spila með Skagamönnum. “Það er þó auðveldara að hætta á þessum tímamótum, þegar ég kveð með sæmd, fullviss um að hafa skilað góðu til míns uppeldisfélags. Einhvern tímann kemur að kveðjustund og ég gat ekki hugsað mér hana betri en eftir síðasta heimaleikinn, þegar ég fékk tækifæri til að spila og kveðja og gerði það með því að skora þrennu.”

Í Skessuhorni vikunnar er ítarlega rætt við markahrókinn Hjört Júlíus Hjartarson og farið yfir ferilinn.