Á fundi sveitarstjórnar Borgarbyggðar 18. október sl. var formlega samþykkt ný forvarnastefna í málefnum barna, unglinga og ungmenna í sveitarfélaginu. „Fjölskyldan, skólinn og skipulegt félagsstarf skipta meginmáli í uppvexti ungs fólks. Styrkur þeirra og öflugt samstarf getur ráðið úrslitum í því að bægja frá óæskilegum áhrifum sem leitt geta til áhættuhegðunar barna og unglinga á borð við neyslu fíkniefna,“ segir í upphafsorðum stefnu sveitarfélagsins.

Þá segir að sýnt hafi verið fram á að líkur á vímuefnaneyslu minnka eftir því sem tengsl barna og foreldra eru sterkari og samverustundir fjölskyldunnar fleiri. Einnig hefur skipulögð íþrótta- og tómstundastarfsemi jákvæð áhrif á lífsstíl ungmenna. Skólar gegna lykilhlutverki í lífi fjölskyldunnar og nauðsynlegt er að þeir hafi skýra forvarnastefnu.