Síðasta vika var vika vonbrigða hjá kvennaliði Snæfells. Eftir fljúgandi start í byrjun, sigur í tveimur fyrstu leikjunum gegn Val og Haukum, var sigurinn dæmdur af þeim gegn Hafnafjarðarliðnu, sem Snæfell vann sl. miðvikudagskvöld 73:69. Snæfellsstúlkur töpuðu síðan fyrir KR í Frostaskjólinu í gær og eru því aðeins með tvö stig eftir fyrstu þrjár umferðirnar.  Leikurinn gegn KR endaði 79:72. Snæfellsstúlkur sýndu ágætan leik og stóðu lengi vel í KR-ingum en náðu ekki að klára dæmið. Snæfell var betra liðið framan af fyrri hálfleik en KR tókst að komast yfir áður en blásið var til hálfleiks, 36:34. Einungis átta stúlkur voru á skýrslu hjá Snæfelli í leiknum og breiddin því minni en hjá heimaliðinu, en talsvert er um meiðsli í herbúðum Snæfells um þessar mundir.  Kieraah Marlow var stigahæst hjá Snæfelli með 23 stig og Alda Leif Jónsdóttir kom næst með 16.