24. október. 2011 11:36
Körfuknattleikslið ÍA fer vel af stað í byrjun leiktíðar í fyrstu deild á komandi vetri en liðið tók á móti liði GK frá Grindavík síðastliðinn föstudag. Nokkurs taugatitrings gætti meðal leikmanna beggja liða í byrjun leiks og einkenndust fyrstu fimm mínútur leiksins af því, heimamenn virtust eiga í vandræðum með að finna boltanum leið í körfuna og að loknum fimm mínútum var staðan 7-5 Grindavík í vil. Meiri varð forysta gestanna ekki því Skagamenn smullu í gang, jöfnuðu leikinn og komust yfir, og að loknum fyrsta leikhluta var staðan 19-15 ÍA í vil.
Í öðrum leikhluta höfðu Skagamenn talsverða yfirburði, vörnin góð og sóknir liðsins skiluðu sér í körfuna. Í lok annars leikhluta voru þeir komnir í þægilega stöðu með fimmtán stiga forskot og staðan 44-29. Í byrjun þriðja leiklhluta virtust gestirnir vera að lifna við, náðu að minnka forskot heimamanna um sex stig en komust ekki lengra, Skagamenn tóku völdin að nýju og að loknum fjörugum þriðja leikhluta var staðan 69-53 þeim í vil. Í fjórða leikhluta greiddu svo heimamenn gestum sínum náðarhöggið með talsverðum yfirburðum, skoruðu 29 stig á móti 22 og lauk leiknum með 23 stiga sigri Skagamanna 98-75.
Besti maður Skagamanna var Terrence Watson en hann skoraði 37 stig, hirti 13 fráköst og var með 9 stoðsendingar. Næstir honum komu þeir Dagur Þórisson með 16 stig og Sigurður Rúnar Sigurðsson með 14 stig. Atkvæðamestir í liði Grindvíkinga voru þeir Haraldur Jón Jóhannesson með 20 stig og Ásgeir Ásgeirsson með 14 stig.
Næsti leikur liðsins er föstudaginn 28. október en þá sækja þeir lið KFÍ á Ísafirði heim.