27. október. 2011 09:33
Samhljóma var samþykkt á fundi bæjarstjórnar Akraness sl. þriðjudag að stofna keltneskt fræðasetur. Gert er ráð fyrir að það verði staðsett á Safnasvæðinu í Görðum, en á næstu vikum verður unnið að frekari undirbúningi og hugað að verkefnum og samstarfi við ýmsa aðila. Stjórn Akranesstofu var falið að hafa umsjón með frekari framgangi verkefnisins. Tilgangur keltnesks fræðaseturs verður m.a. að sinna fræðslu um sögu Akraness, íslenska menningarsögu og nágrannalandanna og stuðla að iðkun fræða og samstarfi innlendra og erlendra fræðastofnana innan vébanda setursins. Fræðasetrinu er einnig ætlað að veita ráðgjöf og stuðning fyrirtækjum sem vilja nýta sér menningarsöguna í sinni starfsemi, hvetja til rannsókna, afla heimilda um mannlíf og náttúru. Ásamt öðru margháttuðu hlutverki á setrið stuðla að verndun menningar- og náttúruminja, annast kynningar- og útgáfustarfsemi svo og sýningar og gegna upplýsingahlutverki gagnvart ferðamönnum.
Í tilkynningu frá Akraneskaupstað segir að bent hafi verið á að á Akranesi og í næsta nágrenni séu keltnesk áhrif áberandi, m.a. í örnefnum á svæðinu. Áhugi fræðimanna á þessum þætti Íslandssögunnar, þ.e. landnámi og áhrifum kelta á Íslandi hefur aukist mjög á undanförnum árum og er þess vænst að hið nýja fræðasetur verði farvegur fyrir frekari rannsóknir og lifandi umræður um þetta áhugaverða efni. Vitað er að fræðimenn greinir nokkuð á um margt er þetta varðar og er þess vænst að fræðasetrið á Akranesi verði vettvangur lifandi umræðu um þessi málefni og ýmis önnur sem því tengjast með beinum og óbeinum hætti.