Bæjarstjórn Snæfellsbæjar tók á fundi sínum í vikunni undir ályktun sveitarstjórnar Skagafjarðar varðandi ráðstöfun á veiðigjaldi, en ítrekar jafnframt að gætt verði hófs við ákvörðun um gjaldtöku.

Í ályktun sveitarstjórnar sveitarfélagsins Skagafjarðar er fagnað tillögum um ráðstöfun veiðileyfagjalds frá starfshópi sjávarútvegsráðherra, er fela í sér viðurkenningu á þeirri miklu tilfærslu fjármagns sem við lýði er frá landsbyggðinni til höfuðborgarsvæðisins og styður þá viðleitni sem í tillögunum er að finna til að tekjurnar komi til baka, a.m.k. að hluta til. “Í tillögum starfshópsins er gert ráð fyrir að tekjur af veiðigjaldi skiptist þannig að 50% renni í ríkissjóð, 40% til sjávarbyggða og 10% til þróunar- og markaðsmála í sjávarútvegi. Veiðigjald verði einn af lögmætum tekjustofnum sveitarfélaga,” segir í ályktuninni, en veiðileyfagjaldið að óbreyttu tekjustofn ríkisins.