17. september. 2012 09:01
Smábátasjómenn á Snæfellsnesi funduðu um nýgerðan kjarasamning milli útgerðarmanna og sjómanna sl. fimmtudag í Ólafsvík. Á fundinn mættu Sævar Gunnarsson, formaður Sjómannasambands Íslands, ásamt Hólmgeiri Jónssyni framkvæmdastjóra Sjómannasambandsins. Fjölmargir sjómenn mætti á fundinn. Kynntu þeir Sævar og Hólmgeir samninginn sem þó á efir að samþykkja af sjómönnum og útgerðarmönnum. Eins og komið hefur fram eru smábátasjómenn eina stéttin í landinu sem hefur verið án samninga. Hart var tekist á um samninginn og þóttu sumum að sér vegið með innihaldi hans. Sagði einn fundarmanna að þessi samningur lækkaði laun hans um heil 30%. Var sá hinn sami harðorður í garð samningamanna. Aðrir sögðu að samningurinn væri sambærilegur og þeir þegar hefðu í beinum samningum við útgerðarmenn.
Sævar Gunnarsson svaraði því að það væri allskonar tilbrigði í gangi um hvernig menn borguðu. En þessi samningur tæki mið af samningum LÍU. Aðspurður sagði Sævar að ástæða þess að ekki hefði verið fyrir löngu búið að semja vera þá að Sjómannasambandinu skorti bakland. Að fundi loknum var skipst á skoðunum við Sævar og Hólmgeir og farið betur yfir ýmis mál.
Forystumenn útgerðarmanna og sjómanna hafa samþykkt nýja samninginn. Skrifleg kosning um hann er komin í gang á meðal sjómanna og er búist við að niðurstaða úr kosningunni liggi fyrir 6. október nk.