09. nóvember. 2012 12:33
Kirkjuþing 2012 verður sett á morgun klukkan 9 í Grensáskirkju. Fyrir þinginu liggja 40 mál og hafa þau aldrei verið fleiri, að því að fram kemur í tilkynningu frá Þjóðkirkjunni. Meðal mála eru nokkrar tillögur um undirbúning að sameiningu prestakalla, bæði á landsbyggðinni og á höfuðborgarsvæðinu. Það á meðal er tillaga um sameiningu Garða- og Saurbæjarprestakalla sunnan Skarðsheiðar frá og með 1. janúar 2014. Lagt er til annars vegar að kirkjuþing kjósi nefnd til að fjalla um skipan prestsþjónustunnar á landinu öllu og vinna að tillögum að hagræðingu í skipan prestakalla. Þær tillögur taki gildi 1. júlí 2014. Hins vegar að vísa til kirkjuráðs tillögum nefndar sem skipuð var fyrr á árinu um skipulagsmál kirkjunnar á höfuðborgarsvæðinu. Tillögur nefndarinnar fela í sér miklar breytingar með sameiningum prestakalla á höfuðborgarsvæðinu og í nærsveitum, frá Kjós og að Suðurnesjum. Í stað 31 prestakalls á þessu svæði verði þau ellefu.
Lagt er til að við sameiningu prestakalla skuli þau lögð niður, nýtt prestakall stofnað og auglýst laust til umsóknar. Breytt framkvæmd gildi um tillögur um sameiningu prestakalla sem kunna að verða lagðar til frá ársbyrjun 2014. Þá liggja fyrir tillögur um breytingar varðandi val og veitingu prestsembætta og um auglýsingar á þeim. Meðal tillagna er sú breyting að í prestaköllum verði teknar upp kjörnefndir sem kjósi milli umsækjenda, að undangenginni kynningu.
Nokkur mál sem fyrir liggja varða skipulag og starf kirkjuþings. Breytingar á kjöri til þingsins eru lagðar til og að kirkjuþing komi að jafnaði saman tvisvar á ári en þingnefndir starfi milli þinga. Af öðrum málum má nefna tillögur er varða hlunnindi á kirkjujörðum, félagatal kirkjunnar, tillögu um miðaldadómkirkjuna í Skálholti og um flutning Þorláksbúðar.
Um kirkjuþing
Kirkjuþing starfar á grundvelli laga um stöðu, stjórn og starfshætti þjóðkirkjunnar, nr. 78 frá 1997. Samkvæmt ákvæðum þeirra fer það með æðsta vald í málefnum þjóðkirkjunnar innan lögmæltra marka, þ.e. nema önnur ákvæði þeirra eða annarra laga mæli fyrir um annað. Á kirkjuþingi eiga sæti 29 kjörnir fulltrúar, 12 vígðir menn og 17 leikmenn, auk þess biskup Íslands, tveir vígslubiskupar og einn fulltrúi guðfræðideildar Háskóla Íslands og fulltrúi kirkjuþings unga fólksins með málfrelsi og tillögurétt. Forseti kirkjuþings er kosinn til fjögurra ára úr röðum leikmanna. Á þinginu starfa allsherjar-, fjárhags- og löggjafarnefnd og eiga allir fulltrúar, nema forseti, sæti í einhverri þeirra. Þingið kemur saman árlega og taka þingstörf jafnan um eina viku. Öll mál eru flutt í fyrri umræðu, vísað í nefnd og síðan tekin fyrir í síðari umræðu þegar þau koma úr nefndinni. Að jafnaði er fyrri umræða ítarlegri og afgreiðsla mála er jafnan síðustu þingdagana.