26. nóvember. 2012 10:12
„Mér sýnist að þetta verði vika að minnsta kosti eftir þeim fréttum sem við höfum af ástandi Herjólfs,“ segir Pétur Ágústsson framkvæmdastjóri Sæferða í Stykkishólmi í samtali við Skessuhorn. Breiðafjarðarferjan Baldur mun leysa Herjólf af meðan skipið verður í viðgerð, en það laskaðist í óhappi í Landeyjahöfn sl. laugardag. Herjólfur sigldi engu að síður milli lands og Eyja um helgina. Baldur fór frá bryggju í Hólminum upp úr miðnætti í gærkvöldi og skipin mættust úti af Reykjanesi rétt fyrir átta í morgun. Baldur hefur síðan siglingar á milli með tveimur ferðum síðdegis í dag. Pétur segir að Sæferðir hafi ákveðnum skyldum að gegna við Vegagerðina, sem hafi lofað að kappkostað verði að halda vegum opnum meðan á þessu stendur.
„Við erum samt ekkert hrifin af því að þurfa að hlaupa svona í skarðið og þurfa að leggja af flutninga á bílum og vöru yfir Breiðafjörð á meðan. Við skiljum vel að okkar viðskiptavinir og fólk á okkar starfssvæði sé ekki ánægt með þetta, enda hafa flutningar verið talsvert miklir núna í haust, sérstaklega vöruflutningar,“ sagði Pétur, en áfram verður bátur í ferðum með fólk og póst yfir Breiðafjörð meðan Baldur er í Eyjasiglingum. Pétur sagði að þau hjá Sæferðum hefðu reyndar bent á lausn þegar smíði á nýjum Herjólfi var boðin út seinast. „Sú lausn fól í sér varaskip í siglingarnar. Við höfum haldið því fram að það þurfi varaskip í þær eins og hefur komið ítrekað í ljós,“ sagði Pétur.
Ásthildur Sturludóttir sveitarstjóri í Vesturbyggð tjáði sig um málið á Facebook í gær: „Við höfum fullan skilning á aðstæðum Vestmannaeyinga en það á ekki að bitna á okkur. Við vonum að hægt verði gera við Herjólf hið fyrsta og skipið komist í lag fljótt. Við sættum okkur ekki við þetta. Um hávetur þegar allra veðra er von er okkar helstu samgönguæð kippt frá okkur. Þetta er eins og blaut og ísköld tuska beint í andlitið á íbúum hér frá Vegagerðinni.“