29. nóvember. 2012 08:10
„Ég hanna sjálf öll þau föt sem ég sauma en kalla mig þó ekki fatahönnuð því ég hef ekki nám í hönnun að baki. Ég er hins vegar með fjögurra ára nám í kjólasaum sem ég lauk frá Iðnskólanum í Reykjavík árið 2008. Árið 2010 tók ég svo sveinsprófið í kjólasaum og hef starfað við þetta sjálfstætt síðan,“ segir Guðmunda Sjöfn Magnúsdóttir á Akranesi, sem selur fatnað sinn undir merkinu TdP design. Hún segist sauma kvenfatnað í öllum stærðum, allt frá kjólum fyrir fermingarstúlkur og líka á mömmurnar og ömmurnar. „Ég hef að undanförnu haldið mig svolítið við stærri númerin en annars er þetta mest eftir pöntunum. Ég reyni þó að sauma eitthvað á lager líka og sel það í versluninni hjá Smáprenti við Skagabraut og einnig hef ég verið með föt í Gallerí Urmul og svo fer ég nokkra daga í mánuði til Reykjavíkur en þar geng ég að verslunarplássi í Álfheimunum, sem er leigt út dag og dag. Vinnustofuna er ég með heima hjá mér núna.“
Hafði ekki tíma fyrir verslunarreksturinn
Um eins árs skeið rak Guðmunda ásamt Tinnu Rós Þorsteinsdóttur verslunina Origami við Stillholt á Akranesi. „Það gekk rosalega vel og var mikið að gera en svo fór Tinna í nám og ég hreinlega lagði ekki í að reka þetta ein vegna umfangsins. Fólk hefur verið að vorkenna okkur og hefur haldið að þetta hafi ekki gengið upp og þess vegna hefðum við lokað, en það var ekki ástæðan heldur einfaldlega það að ég sá ekki fram á að geta sinnt þessu ein með fatasaumnum og barnauppeldi.“
Sjá nánar viðtal við Guðmundu Sjöfn Magnúsdóttur kjólasvein á Akranesi í aðventublaði Skessuhorns sem nú er komið út.