Snæfellsstúlkur tóku á móti Keflavíkurdætrum í gær, laugardaginn 1. desember, og áttu þar möguleika á að binda enda á sigurgöngu Keflvíkinga í deildinni. Fyrir leik var Keflavíkurliðið ósigrað með 22 stig en Snæfell í öðru sæti með 18 stig. Mikill hraði og barátta var í leik Snæfells í fyrsta leikhluta og virtust þær ætla að stinga andstæðinga sína af strax í byrjun. Keflvíkingar komu þó til baka, eins og við var að búast, og í hálfleik leiddi Snæfell með einu stigi, 37 - 36. Leikurinn var jafn fram í miðjan þriðja leikhluta en þá tóku þær keflvísku af skarið og settu niður "stórar" körfur og komust í tíu stiga forystu fyrir síðasta fjórðunginn. Snæfellsstúlkur börðust fyrir sínu af krafti, náðu að vinna upp muninn og þegar 13 sekúndur voru eftir, og staðan 70 - 72, átti Snæfell sókn sem gat gert út um leikinn þeim í vil. Hildur Björg tók þriggja stiga skot sem geigaði og í kjölfarið var brotið á Söru Rún sem setti bæði vítaskotin niður og úrslit leiksins urðu 70 - 74.