Stjörnugrís hf. hefur sent Akraneskaupstað umsókn um lóð undir a.m.k. 1500 fermetra húsnæði sem fyrirtækið ætlar að nýta undir fóðurskemmu. Standa óskir fyrirtækisins til að lóðin verði staðsett á hafnarsvæðinu þannig að flutningar á fóðri í húsnæðið verði sem allra minnstur. Áætlar fyrirtækið að flytja inn 1800-2000 tonn á þriggja til fjögurra mánaða fresti. Stjörnugrís hf. er með umfangsmikla framleiðslu á svína- og alifuglakjöti og eru starfsstöðvar þess á Vallá á Kjalarnesi og Melum í Melasveit. Að sögn Gísla Gíslasonar, formanns hafnarstjórnar, verður umsóknin rædd á fundi stjórnarinnar í vikunni og átti hann ekki von á öðru en að menn tækju jákvætt í óskir Stjörnugríss hf. Nákvæma staðsetningu lóðarinnar á hafnarsvæðinu ætti eftir að ræða við fyrirtækið en nokkrir álitlegir staðir koma til greina.