20. mars. 2003 09:05
Grundarfjörður og Snæfellsbær halda áfram
Í byrjun þessa mánaðar rann út lokafrestur til að skila umsóknum um þátttöku í forvali samkeppninnar um „Rafrænt samfélag“ sem Byggðastofnun stendur fyrir. Samkeppnin er hluti af byggðaáætlun sem samþykkt var á Alþingi á síðasta ári. Meginmarkmið verkefnisins er að hrinda í framkvæmd metnaðarfullum aðgerðum á sviði fjarskipta- og upplýsingatækni. Valnefnd, sem skipuð var af iðnaðarráðherra, var falið að meta þær umsóknir sem bárust og velja fjórar til átta umsóknir sem halda áfram í samkeppninni. Nefndin valdi verkefni fjögurra byggðarlaga til áframhaldandi þátttöku í samkeppninni. Þar á meðal eru tvö sveitarfélög á Vesturlandi, : Snæfellsbær og Grundarfjörður. Alls bárust þrettán umsóknir.
Valnefnd hefur á grundvelli þessa valið verkefni fjögurra byggðalaga til þátttöku í samkeppninni um ,,Rafrænt samfélag“. Hin tvö verkefnin eru frá :Aðaldælahreppi, Húsavíkurbæ og Þingeyjarsveit annnars vegar og sveitarfélögunu Árborg, Hveragerði og Ölfusi hinsvegar. Alls bárust 13 umsóknir í samkeppnina. Þeir fjórir aðilar sem halda áfram í keppninni fá framlög sem þau skulu nýta til að ganga frá viðskiptaáætlunum, markmiðssetningum og nánari útfærslum á þeim hugmyndum sem umsóknirnar byggja á.
Valnefndin mun síðan á grundvelli þeirra gagna velja tvö til fjögur verkefni sem munu hljóta framlög úr ríkissjóði á móti a.m.k. jöfnu eigin framlagi. Í heild mun ríkissjóður verja 30-40 milljónum króna árlega í uppbyggingu rafrænna samfélaga á landsbyggðinni á næstu þremur árum.