31. ágúst. 2003 08:25
Góð aðsókn í Menntasmiðju unga fólksins
Menntasmiðja unga fólksins á Akranesi hefst 12. september n.k. og er allt útlit fyrir að fullskipað verði í smiðjuna að sögn Arnars Símonarsonar verkefnisstjóra. Öllum atvinnulausum ungmennum á aldrinum 17 - 25 ára gafst kostur á að sækja um þau 15 pláss sem í boði eru. Menntasmiðjan byggir á lýðskólahugmyndinni og er í anda þeirra vakningu sem nú á sér stað víða um Evrópu og nefnist „nýtt tækifæri til náms“ eða second chance to school. Um er að ræða 12 vikna nám þar sem nemendum gefst m.a. kostur á starfsþjálfun og munu miðla af þeirri reynslu sinni sín í milli.
Undirbúningur hófst fyrir tveimur árum þegar ljóst var að sá hópur ungmenna sem virtist ekki finna sig í hefðbundnum leiðum menntakerfisins og var án atvinnu fór stækkandi. Símenntunarmiðstöð Vesturlands fer með stjórn Menntasmiðjunnar í samstarfi við Svæðisvinnumiðlunar Vesturlands og félagsþjónustu Akraneskaupstaðar. Fjárhagsáætlun verkefnisins hljóðar uppá 4 mkr. Þróunarsjóður framhaldsskóla, Starfsmenntasjóður félagsráðuneytisins, forvarnarsjóður, Vinnumálastofnun og Akraneskaupstaður styrkja verkefnið.