03. september. 2003 09:19
Samstarf eður ei?
Eins og fram kom í síðasta tölublaði Skessuhorns hefur fjallskilanefnd Mýrasýslu skorað á Borgarneskjötvörur að leita eftir samstarfi við Dalamenn til að tryggja áframhaldandi rekstur sláturhússins í Búðardal, sem er sem stendur það eina sem ekki er ljóst að verði lokað á Vesturlandi.
Í svari Axels Ólafssonar framkvæmdastjóra Borgarnes kjötvara kemur fram að leitað hafi verið eftir slíku samstarfi af hálfu Borgnesinga á síðasta ári. „Í hugmyndum okkar var gert ráð fyrir sauðfjárslátrun í Búðardal, vinnslu og stórgripaslátrun í Borgarnesi,“ segir í bréfi Axels til Fjallskilanefndar.
„Það er skemmst frá því að segja að Dalamenn höfðu allt aðrar hugmyndir og á stuttum fundi sem haldinn var í Borgarnesi var okkar niðurstaða sú að enginn flötur væri á samstarfi þar sem Dalamenn vildu í raun engar breytingar, enda töldu þeir sín mál í allt öðrum og betri farvegi en í Borgarnesi. Með sama hætti vildi Byggðastofnun og aðrir ekki koma að þessum málum, sem við töldum á þeim tíma, góðan kost. Mér er kunnugt um að áður höfðu framkvæmdastjóri og stjórnarformaður KB boðið Dalamönnum samstarf um slátrun án árangurs.“
Haraldur Líndal sveitarstjóri Dalabyggðar segir að gera verði greinarmun á samstarfi og samruna. „Við lístum því yfir að við værum tilbúnir til samstarfs en ekki samruna eins og þeir lögðu til. Þeir vildu að okkar sláturhús, með tiltölulega litlar skuldir, færi inn í skuldasúpuna í sláturhúsinu í Borgarnesi en þar greindi okkur á. Við höfum alltaf verið tilbúnir til samstarfs en viljum halda sláturhúsinu sem séreign. Axel er fullkunnugt um það.