26. september. 2003 03:08
Reynt að finna lausn á húsnæðismálum heilsugæslu
Jón Kristjánsson, heilbrigðisráðherra, fundaði með bæjaryfirvöldum í Borgarbyggð, síðastliðinn föstudag um húsnæðismál heilsugæslustöðvarinnar í Borgarnesi. Húsnæðismál heilsugæslustöðvarinnar og Dvalarheimilisins hafa verið í deiglunni um all nokkurn tíma en það hefur hinsvegar dregist í nokkur misseri að framkvæmdir gætu hafist þar sem ekki hefur náðst samkomulag milli heimamanna og ráðuneytisins um hvað skuli gera. „Það eru þrjár leiðir færar en sú sem heimamenn hafa viljað fara er að byggt verði við heilsugæslustöðina en að Dvalarheimilið kaupi efri hæðina til að bæta við sitt húsnæði,“ segir Páll S. Brynjarsson bæjarstjóri Borgarbyggðar.
Hinar leiðirnar sem Páll nefnir er að Dvalarheimilið byggi við húsið sín megin og að heilsugæslan fari í endurbætur á sínu húsnæði eða að leigt verði húsnæði undir starfsemi heilsugæslunnar á öðrum stað og Dvalarheimilinu selt núverandi húsnæði heilsugæslustöðvarinnar. Þessi kostur mun hafa verið skoðaður nokkuð og samkvæmt heimildum Skessuhorns, hefur Borgarland, eigandi Hyrnutorgs, boðist til að byggja húsnæði sem meðal annars myndi hýsa heilsugæslustöð, á lóð sem fyrirtækið á beint á móti Hyrnutorgi.
„Ráðherra tjáði okkur að ekki væri til fjármagn hjá ráðuneytinu í nýbyggingu en menn voru sammmála um að setja af stað vinnuhóp með fulltrúum heimamanna og ráðuneytsins til að fara yfir húsnæðismálin í heild sinni. Þessi hópur mun vinna hratt úr þeim hugmyndum sem liggja fyrir með það að markmiði að hægt verði að hefja framkvæmdir sem fyrst,“ segir Páll.