19. október. 2003 10:45
Menningarmiðstöðin á Hellnum opnuð
Um aðra helgi verður opnuð á Laugabrekku á Hellnum Menningarmiðstöð og gestastofa fyrir Þjóðgarðinn Snæfellsjökul. Að sögn Þorsteins Jónssonar eiganda Laugabrekku sem stendur fyrir byggingu menningarmiðstöðvarinnar er um að ræða 400 fermetra byggingu sem er fyrsti áfangi í miklum framkvæmdum sem fyrirhugaðar eru á svæðinu. „Menningarmiðstöðin sjálf verður þrefalt stærri og ég vonast til að viðbótin verði tilbúin næsta sumar. Í menningarmiðstöðinni verður fjölnotasalur fyrir bíósýningar og fyrirlestra og sýningarsalur fyrir breytilegar sýningar og loks veitingasalur.
Í tengslum við þetta verður síðan í framtíðinni byggð stór og mikil safnamiðstöð þar sem verður sögusafn, eldfjallasafn og Jule Verne stofa. Safnasvæðið verður fyrir framan kirkjuna á Hellnum en hinumegin við veginn er komið deiliskipulag fyrir ferðamannaþorp í fornum stíl,“ segir Þorsteinn.
Að sögn Þorsteins eru það tvö félög sem standa að uppbyggingunni á Laugabrekku, annarsvegar Menningarmiðstöðin Hellnum ehf. sem er í eigu hans og hinsvegar Hellisvellir ehf. sem standa að byggingu ferðamannaþorpsins en að því félagi koma m.a. tveir norskir aðilar.
Við opnunina þann 25. október n.k. verður opnuð ljósmyndasýning þar sem sýndar verða stórar ljósmyndastækkanir frá horfinni tíð á svæði þjóðgarðsins og frá Hellnum og Arnarstapa. Í menningarmiðstöðinni verður gestastofa fyrir þjóðgarðinn og inn í hana verður hönnuð sérstök sýning sem opnar í lok apríl í vor.