Síðastliðinn fimmtudag, 29. júlí, voru opnuð tilboð í byggingu nýs kerskála og aðrar byggingar vegna þriðja áfanga Norðuráls á Grundartanga, þ.e. stækkunar álversins úr 90.000 tonnum í 180.000 tonn. Útboðið tók til byggingar kerskála (um 31.000 m2), spennistöðva og aðstöðu fyrir loftpressur og blásara (samtals um 900 m2). Verkið felur í sér aðstöðusköpun á vinnusvæðinu, jarðvinnu, uppsteypu, forsteyptar einingar, stálvirki, klæðningar, veitukerfi og búnað, almennar lágspennulagnir og frágang innanhúss fyrir nýju byggingarnar. Alls bárust fjögur tilboð í verkið en þau voru frá Ístaki hf., ÞG verktökum ehf., Sveinbirni Sigurðssyni hf. og Íslenskum aðalverktökum hf. Samkvæmt þessum tilboðum er Ístak lægst, með 3,239 milljarða kr. í verkið en ÞG verktakar eru mjög nærri með 3,286 milljarða króna. Í fréttatilkynningu frá Norðuráli kemur fram að verið sé að fara yfir tilboðin.