02. október. 2013 09:20
Tilkynnt var síðastliðinn mánudag til lögreglunnar í Borgarfirði og Dölum um dauðan og rotnandi skíðishval á fjöru í landi Lambastaða á Mýrum. Bóndi á næsta bæ gekk fram á hvalshræið í fjörunni þar sem hann var að huga að fé. Lögreglan fór á staðinn og kannaði aðstæður. Hvalurinn sem er um 18 metra langur hafði sýnilega verið dauður í fjörunni í nokkurn tíma.
Að mati lögreglu hefur hvalinn trúlega rekið þarna upp í síðasta stórstreymi og suðvestan stormi. Ekki er ólíklegt að hann hafi einmitt rekið á land í sama óveðrinu og búrhvalinn rak á land í Suðurey úti af Löngufjörum og sagt var frá í Skessuhorni í síðustu viku. Höfðu menn á orði að það yrði trúlega auðvelt að vinna á tófunni í vetur þegar hún færi að sækja í „ilmandi skrokkinn“ í landi Lambastaða. Áður hefur hvali rekið á fjörur fyrir Lambastaðalandi. Meðal annars fyrir rúmum aldarfjórðungi þegar rak stóran hval nærri bæjarhúsunum. Þá sagði í tilkynningu frá lögreglu á þriðjudag að tilkynning hefði borist um annan minni hval rekinn undan Miðhúsum á Mýrum og sé verið að kanna þann hvalreka betur.