16. október. 2013 02:00
Á síðustu mánuðum hafa tekið til starfa á Grundartanga tvær endurvinnslur. Báðar sækja þær hráefni að hluta eða öllu leyti í áliðnaðinn í landinu. Kratus, sem endurvinnur ál úr álgjalli, hóf starfsemi fyrir tæpu ári. GMR sem endurvinnur stál er mun stærri í sniðum. Þar hófst stálvinnsla fyrir rúmum mánuði og gengur vel.
Tæpur þriðjungur ársframleiðslu GMR verður endurvinnsla á svokölluðum göfflum og börrum, straumleiðurum úr kerum álveranna. Straumteinarnir og tindaefnið sem GMR framleiðir fer síðan til fyrirtækis sem heitir Járn og blikk sem smíðar úr þeim nýja gaffla og barra fyrir álverin. Nú þarf ekki lengur að flytja inn þessa hluti til að rafgreina súrálið í kerunum og síðan flytja þá úr sér slitna úr landi sem úrgang. Nú sparast sá gjaldeyrir sem fór í innflutninginn og í flutningsgjöld algjörlega og til verður fjöldi starfa.
Hjá GMR eru bein störf 25 og sjö hjá Kratus. Störfum tengdum þessari hringrás sem skapast við endurvinnsluna fjölgar síðan til muna á Grundartanga á næsta ári. Fyrirtækið Járn og blikk ætlar að hefja uppbyggingu þar um áramótin. Það verður á næstu lóð við GMR og er ætlað að þar verði 30-40 manna vinnustaður.
Ljóst er því að á skömmum tíma verða til 60-70 bein störf í tengslum við endurvinnsluna á Grundartanga. Kosturinn við endurvinnslu á efni eins og stáli er líka sá að í hana fer aðeins 7% af þeirri orku sem fer í frumvinnslu stáls. Græna orkan sem notuð er til framleiðslunnar á Grundartanga nýtist því vel.
Nánar er fjallað um nýsköpun í endurvinnslu á Grundartanga í Skessuhorni sem kom út í dag.