02. desember. 2013 10:32
Snæfell og Skallagrímur eru úr leik í Powerade bikarkeppni karla í körfubolta eftir að liðin biðu lægri hlut í leikjum sínum í gærkvöldi, þegar 16 liða úrslit bikarsins fóru fram. Snæfell lék gegn spútnikliði Hauka á útivelli í Hafnarfirði. Hólmarar höfðu yfirhöndina í fyrri hálfleik og komust mest 13 stigum yfir í miðjum öðrum leikhluta. Hafnfirðingar létu ekki deigan síga og söxuðu á forskot Hólmara fyrir hálfleik og var staðan þá 45:51. Haukar bættu svo um betur og komust yfir í þriðja leikhluta og var staðan í lok leikhlutans 66:65 fyrir heimamenn. Gestirnir reyndu hvað þeir gátu til að ná forystunni á nýjan leik í lokaleikhlutanum en án árangurs. Lokatölur því 87:84 fyrir Hauka.
Stigahæstur í liði Snæfells í leiknum var Bandaríkjamaðurinn Vance Cooksey með 27 stig. Á eftir honum komu síðan Pálmi Freyr Sigurgeirsson með 15, Stefán Karel Torfason 13, Sigurður Á. Þorvaldsson 12, Finnur Atli Magnússon 9, Sveinn A. Davíðsson 5 og Kristján P. Andrésson 3.
Í Borgarnesi tóku Skallagrímsmenn á móti liði Þórs frá Þorlákshöfn. Nokkuð jafnt var með liðunum í fyrri hálfleik en Skallagrímsmenn voru þó skrefinu framar og leiddu lengstum. Undir lok annars leikhluta sigu Sunnlendingar hins vegar fram úr og höfðu yfir í hálfleik 51:48. Borgnesingar komu heillum horfnir til leiks í seinni hálfleik og fylgdust með Þórsurum raða niður hverri körfunni á fætur annarri. Ráðaleysi var í vörn og sókn heimamanna sem gestirnir nýttu sér óspart. Staðan að loknum þriðja leikhluta var 83:66. Sama lánleysi var allsráðandi í lokaleikhlutanum hjá heimamönnum og urðu lokatölur 108:80.
Orri Jónsson var stigahæstur í liði Borgnesinga í leiknum með 16 stig en á eftir honum kom Grétar Ingi Erlendsson með 14. Þá skoruðu Egill Egilsson 12, Oscar Bellfield 11, Trausti Eiríksson og Davíð Guðmundsson 9 hvor, Sigurður Þórarinsson 5, Ármann Vilbergsson 3 og Davíð Ásgeirsson 1. Liðið lék án Páls Axels Vilbergssonar í leiknum.