12. desember. 2013 09:46
Síldarleit stóru skipanna á Breiðafirði virðist engan árangur hafa borið undanfarnar vikur. Á vef HB Granda segir að Faxi RE sé nú á leið til Reykjavíkur eftir að hafa leitað að síld í Breiðafirði alla þessa viku. Að sögn Alberts Sveinssonar skipstjóra skilaði leitin engum árangri og nótinni var aldrei kastað í túrnum. ,,Við höfðu fréttir af því að skipverjar á Álsey VE hefði orðið varir við álitlegar lóðningar á dögunum og þar sem við vorum í höfn á Akranesi var ákveðið að kanna málið. Við fórum um sundin við Stykkishólm, í utanverðan Kolgrafafjörðinn og Grundarfjörð þar sem við ákváðum að láta gott heita. Auk okkar var Bjarni Ólafsson AK á svæðinu og Hákon EA kom þangað í einn dag,“ segir Albert.
Mörg af stærri uppsjávarveiðiskipunum eru nú við síldarleit í Breiðamerkurdjúpi þar sem þokkaleg síldveiði hefur verið síðustu daga. Þar er síldin þó mun smærri en sú sem veiddist í Breiðafirði um tíma í haust. Að sögn Alberts skipstjóra á Faxa er Lundey NS nú á leiðinni til Vopnafjarðar með ágætan afla úr Breiðamerkurdjúpi. Spáin fyrir suðurströnd landsins er ekki góð næstu dagana, sunnan- og suðaustan hvassviðri, og sagði Albert að ekki yrði farið austur fyrr en útlit væri fyrir að viðraði til veiða.