13. desember. 2013 12:54
Fjárhagsáætlun Borgarbyggðar fyrir árið 2014 var samþykkt eftir aðra umræðu á fundi sveitarstjórnar sl. fimmtudag. Þar kemur fram að rekstarniðurstaða verður jákvæð, skuldir halda áfram að lækka og sköttum og þjónustugjöldum er að mestu haldið óbreyttum. Álagningaprósenta fasteignaskatts og lóðaleigu er óbreytt, sömuleiðis öll gjöld er tengjast félagsþjónustu, grunn-,leik- og tónlistarskólum sem og æskulýðs- og tómstundamálum. Auknu fjármagni verður varið til viðhalds eigna, gatna og gangstétta og áætlað er að verja um 150 milljónum í nýjar framkvæmdir og fjárfestingar. Þær verða fjármagnaðar með handbæru fé og langtímaláni að upphæð 70 milljónir kr. Eignir sveitarfélagsins eru áætlaðar í árslok 2014 að andvirði 6.094 milljónir króna.
Heildartekjur sveitarsjóðs Borgarbyggðar og B-hluta fyrirtækja eru áætlaðar 2.967 milljónir króna á árinu 2014 en rekstrarútgjöld án fjármagnsliða 2.716 milljónir kr. Framlegð sveitarfélagsins verði því um 13%. Fjármagnsgjöld er áætluð 242 milljónir kr. Samantekin rekstrarniðurstaða Borgarbyggðar á árinu 2013 verður samkvæmt fjárhagsáætluninni jákvæð um níu milljónir króna. Skuldaviðmið Borgarbyggðar verður samkvæmt áætlun 128% í árslok 2014. Heildarskuldir og skuldbindingar eru áætlaðar 4.559 milljónir í árslok 2014. Afborganir langtímalána nema 225 milljónum og skuldir lækka um 63 milljónir á milli ára. Eigið fé sveitarfélagsins verður 1.532 milljónir kr. eða 25%.
Á fundinum var samþykkt langtímaáætlun fyrir árin 2015-2017. Jafnvægi verður í rekstri sveitarfélagsins samkvæmt langtímaáætlun og óverulegar breytingar á skuldastöðu þrátt fyrir að Borgarbyggð muni verja 400 milljónum til að endurbæta og byggja við húsnæði Grunnskólans í Borgarnesi.