22. desember. 2013 11:43
Föstudaginn 20. desember brautskráðust 14 nemendur frá Fjölbrautaskóla Snæfellinga. Af félagsfræðabraut brautskráðust þau Erna Katrín Gunnarsdóttir, Eydís Ösp Þorsteinsdóttir, Jón Þór Magnússon, Kristfríður Rós Stefánsdóttir, Lilja Kolbrún Þorvarðardóttir, Rúnar Geirmundsson, Sædís Ragna Ingólfsdóttir, Sævör Þorvarðardóttir og Unnur Sigurþórsdóttir. Af náttúrufræðibraut brautskráðust Elín Sóley Reynisdóttir, Hrefna Rós Lárusdóttir, Sigþór Freyr Þórsson, Særós Ósk Sævaldsdóttir og Viktoría Sif Viðarsdóttir. Athöfnin hófst á því að Skólameistari Fjölbrautaskóla Snæfellinga, Jón Eggert Bragason brautskráði nemendur og flutti ávarp. Í ávarpinu talaði hann til nýstúdenta m.a. um að það að útskrifast úr framhaldsskóla væri dæmi um að menn hafi sett sér markmið og náð því. Það að ná settu markmiði er vísbending um að næsta markmið sem menn setja sér komi einnig til með að heppnast.
Helga Lind Hjartardóttir námsráðgjafi afhenti síðan nemendum viðurkenningar fyrir góðan námsárangur. Fjölbrautaskóli Snæfellinga, sveitarfélögin sem standa að skólanum auk þýska sendiráðsins og Landlæknisembættisins gáfu viðurkenningarnar en skólinn tekur þátt í verkefninu Heilsueflandi Framhaldsskóli sem er stýrt af embættinu.
Hæstu einkunn á stúdentsprófi hlaut Særós Ósk Sævaldsdóttir. Særós Ósk hlaut einnig verðlaun fyrir góðan árangur í íslensku, spænsku. líffræði og jarðfræði. Særós Ósk hefur stundað tónlistarnám af kappi og spilað með Stórsveit Snæfellsnes frá stofnun hennar ásamt því að syngja fyrir skólans hönd í tvígang í söngkeppni framhaldsskólanna. Sævör Þorvarðardóttir hlaut viðurkenningu fyrir góðan árangur í sögu. Unnur Sigurþórsdóttir hlaut viðurkenningu fyrir góðan árangur í félagsfræði og Lilja Kolbrún Þorvarðardóttir hlaut viðurkenningu fyrir góðan árangur í sálfræði. Einnig hlaut Elín Sóley Reynisdóttir viðurkenningu fyrir góðan árangur í þýsku og Viktoría Sif Viðarsdóttir fyrir góða ástundun í íþróttum.
Kvenfélagið Gleym mér ei gefur einnig nýstúdentum leiðbeiningar út í lífið. En þar má m.a. finna þvottaleiðbeiningar ásamt góðum ráðum við geymslu matvæla.
Tónlistaratriði frá Stórsveit Snæfellsnes er fastur liður í útskriftarathöfn skólans og að þessu sinni fluttu þau tvö lög við frábærar undirtektir. Sveitin er skipuð nemendum skólans og er samstarfsverkefni milli skólans og tónlistarskólanna á Snæfellsnesi. Meðal hljómsveitarmeðlima eru 4 útskriftarnemar sem héldu nú sína lokatónleika með hljómsveitinni, þau eru Elín Sóley Reynisdóttir, Hrefna Rós Lárusdóttir, Jón Þór Magnússon og Særós Ósk Sævaldsdóttir. Þau fengu öll viðkenningu fyrri störf sín í þágu hljómsveitarinnar ásamt Sævöru Þorvarðardóttur sem hefur leikið stórt hlutverk sem gjaldkeri sveitarinnar frá stofnun hennar.
Við athöfnina sem einkenndist af mikilli tónlist, söng Særós Ósk lagið Þorláksmessa við undirleik Jóns Þórs Baldurs hljómsveitarstjóra og Emils sem er einnig nemandi við skólann. Einnig fluttu Elín Sóley og Hrefna Rós lagið, Meðal Hirðarnir fátæku (The first noel) við undirleik Lazlo Petö.
Kveðjuorð til nýstúdenta fyrir hönd kennara og starfsfólks flutti að þessu sinni Freydís Bjarnadóttir kennari við skólann. Þá hélt Jóhannes Fannar Einarsson ræðu fyrir hönd útskrifaðar stúdenta en það eru 5 og hálft ár síðan hann lauk námi frá FSN. Kristfríður Rós Stefánsdóttir hélt síðan kveðjuræðu fyrir hönd nýstúdenta þar sem hún talaði fallega um skólann og kvaddi kennara og starfsfólk fyrir hönd nýstúdenta.
Athöfninni sem var sérlega lífleg og skemmtileg og ekki síst fyrir skemmtilega kynningu í höndum Lofts Árna enskukennara, lauk með því að Jón Eggert skólameistari bauð gestum í kaffi.