Í gærkvöldi var fyrsti þáttur The Biggest Loser Ísland forsýndur í Bíóhöllinni á Akranesi. Er óhætt að segja að mikill spenningur hafi verið fyrir þættinum þar sem nánast húsfyllir var í höllinni. Fyrsta forsýningin fór fram á Akranesi þar sem einn keppenda, Inga Lára Guðlaugsdóttir, býr á Skaganum en fleiri forsýningar munu fara fram næstu tíu daga víðsvegar um landið. Spenningur fyrir þáttunum er greinilega líka mikill hjá keppendum því auk Ingu Láru þá mættu Arnfinnur Daníelsson, Jóhanna Elísa Engelhartsdóttir og Þór Viðar Jónsson öll á sýninguna en þau eru einnig keppendur í The Biggest Loser Ísland. Þættirnir voru teknir upp á Reykjanesi á 10 vikna tímabili í lok síðasta árs en úrslitaþátturinn verður sýndur í beinni útsendingu í byrjun apríl. Á meðan tökum stóð voru keppendur í stífu æfingaprógrammi og í raun án snertingar við umheiminn þar sem enginn keppenda var með síma eða nettengingu. Þó að allir séu nú komnir heim þá er keppnin ennþá í fullum gangi og keppendur að æfa á eigin spýtur. Í lokaþættinum fer fram lokavigtun og þá kemur í ljós hverjir hafa staðið sig best frá upphafi til enda.