13. janúar. 2014 10:01
Snæfellskonur halda áfram á sigurbraut og unnu sannfærandi sigur þegar Hamarsstúlkur úr Hveragerði komu í heimsókn í gær. Snæfell er komið í 28 stig í Dominosdeildinni, fjórum stigum fyrir ofan Hauka og Keflavík. Hamarsstúlkur komu ákveðnar til leiks, voru einu stigi yfir eftir fyrsta leikhluta. Það var ekki fyrr en á síðustu mínútum fyrri hálfleiks sem Snæfellskonum tókst að ná góðu forskoti í leiknum með 15:0 kafla. Staðan í hálfleik var 33:24 fyrir Snæfell. Heimastúlkur héldu áfram á sömu braut í þriðja leikhluta og voru komnar með góða stöðu fyrir lokafjórðunginn, 52:36. Þær sigldu síðan öruggum sigri heim í lokakaflanum og endaði leikurinn 71:58.
Hjá Snæfelli var Chynna Brown stigahæst með 23 stig og 8 fráköst, Hildur Björg Kjartansdóttir skoraði 18 og tók 11 fráköst, Hildur Björg Sigurðardóttir 12 stig og 12 fráköst, Guðrún Gróa Þorsteinsdóttir 8 stig og 8 fráköst, Rebekka Rán Karlsdóttir og Helga Hjördís Björgvinsdóttir 3 stig hver og þær Hugrún Valdimarsdóttir og Aníta Sæþórsdóttir 2 stig hvor.
Í næstu umferð í Dominosdeildinni fara Snæfellskonur til Njarðvíkur og fer sá leikur fram á miðvikudaginn.