24. janúar. 2014 09:01
Rétt rúmlega þriðjungur fyrirtækja á Vesturlandi telur sig að einhverju leyti hafa tekjur af menningu og listum. Þetta kemur fram í niðurstöðum fyrirtækjakönnunar Samtaka sveitarfélaga á Vesturlandi sem framkvæmd var í nóvember síðastliðnum. Þar sögðu um 5% fyrirtækja hafa tekjur af menningu og listum að öllu eða miklu leyti á meðan tæp 30% fyrirtækja sögðust hafa tekjur að nokkru eða litlu leyti. Drjúgur meirihluti fyrirtækja, eða 65%, telja sig hins vegar hafa engar tekjur af slíkri starfsemi. Að sögn Vífils Karlssonar hagfræðings hjá SSV voru fyrirtæki sem flokkast undir aðra framleiðsla, mannvirkjagerð, verslun, gisti- og veitingarekstur og upplýsingatækni marktækt frekar á þeirri skoðun að þeir hefðu tekjur af menningum og listum. „Fyrirtæki sem flokkast undir fiskveiðar, námur, orkufyrirtæki og fjármála- og tryggingafyrirtæki töldu sig hins vegar algerlega laus við slíkar tengingar. Engin marktækur munur var síðan á þessari afstöðu á milli landssvæða innan Vesturlands.“
Að mati Vífils hefur lengi verið áhugi á því að vita hvert vægi skapandi greina er á Vesturlandi. Hefðbundin atvinnugreinaflokkun veitir engar slíkar upplýsingar og af þeim orsökum voru fyrirtæki á Vesturlandi spurð að hve miklu leyti þau hefðu tekjur af menningu og listum í könnunni. „Svörin ættu því að gefa vísbendingar fyrir því hvert vægi skapandi greina er á Vesturlandi.“
Forsvarsmenn tæplega 200 af 900 starfandi fyrirtækjum landshlutans tóku þátt í könnunni, sem telst nokkuð gott svarhlutfall að mati Vífils sem vann könnunina ásamt Einari Þ. Eyjólfssyni hjá SSV.