18. febrúar. 2014 10:30
Á 68. ársþingi Knattspyrnusambands Íslandss (KSÍ) sem haldið var á Akureyri um nýliðna helgi voru tveir sæmdir heiðurskrossi sambandsins. Það voru þeir Jón Gunnlaugsson Akranesi og Guðni Kjartansson í Keflavík. Á heimasíðu KSÍ segir að heiðurskross þessi, sem er æðsta heiðursmerki KSÍ, veitist aðeins undir sérstökum kringumstæðum þeim sem unnið hafa knattspyrnuíþróttinni ómetanlegt gagn.
Jón Gunnlaugsson á að baki mikið starf innan knattspyrnuhreyfingarinnar á Íslandi. Hann var í stjórn Knattspyrnufélags Akraness 1966-1970 og í stjórn knattspyrnuráðs Akraness á árunum 1971-1978 með hléum. Hann var fyrsti formaður Knattspyrnufélags ÍA 1986 eftir endurskipulagningu knattspyrnufélaganna á Akranesi, auk þess að sitja í stjórn Íþróttabandalags Akraness 1988-1996. Jón sat í stjórn Knattspyrnusambands Íslands frá 1990 til 2011 og var m.a. ritari stjórnar, auk þess að sitja í í fjölmörgum nefndum á vegum KSÍ. Þá var Jón Gunnlaugsson leikmaður ÍA á árunum 1968-1982 og lék 5 A-landsleiki fyrir Íslands hönd á árunum 1974-1977. Jón gegndi einnig þjálfarastörfum og þjálfaði m.a. Völsung á Húsavík í 2. deild 1981.
Guðni Kjartansson er íþróttakennari að mennt, er með KSÍ-A þjálfaragráðu, og án vafa einn reynslumesti þjálfarinn í íslensku knattspyrnunni. Guðni hefur stjórnað flestum landsliðum Íslands, m.a. A-landsliði karla, auk þess sem hann stjórnaði U19 landslið karla um árabil og var aðstoðarmaður Sigurðar Ragnars með kvennalandsliðið. Guðni var valinn íþróttamaður ársins árið 1974, fyrstur allra knattspyrnumanna. Hann á að baki 31 A-landsleik sem leikmaður fyrir Ísland á árunum 1967-1973 og var fyrirliði í 7 leikjum. Guðni á m.a. ættir að rekja vestur á Hornstrandir. Faðir hans Kjartan Guðmundsson hefur verið búsettur á Akranesi frá 1958 og mörg síðustu árin verið heimilismaður á Höfða.