15. apríl. 2014 11:59
Eigendur garnverslunarinnar Ævintýrakistunnar á Akranesi hafa ákveðið að hætta rekstri búðarinnar. Í tilkynningu frá eigendum Ævintýrakistunnar, þeim Bjarna Þorsteinssyni og Ruth Jörgensdóttir Rautenberg, segir að tilraunir til að halda rekstrinum áfram hafi því miður ekki tekist eftir að þau ákváðu að taka áskorun viðskiptavina um að halda honum áfram í desember. Þá höfðu þau haft til skoðunar að hætta rekstri. „Það hefur því miður ekki tekist. Hækkandi innkaupsverð þeirra vara sem við verslum með og síharðnandi samkeppni á markaðinum hefur leitt til þess að við teljum nú fullreynt með okkar rekstur,“ segir í tilkynningunni sem birtist á Fésbókarsíðu Ævintýrakistunnar í morgun.
Síðasti opnunardagur verslunarinnar verður föstudagurinn 25. apríl nk. „Ýmis tilboð verða í gangi fram að lokun verslunarinnar þannig að endilega kíkið við og kannið hvort það sé eitthvað sem nýtist ykkur. Einnig viljum við minna á að leysa inn gjafabréf og innleggsnótur.“
Ævintýrakistan hefur verið rekin á Akranesi frá árinu 2006. Lengst af var verslunin til húsa að Skólabraut, en hún var flutt í verslunarhúsið að Smiðjuvöllum í desember 2012. Þar hefur hún verið síðan.
„Við viljum þakka öllum okkar viðskiptavinum og starfsfólki kærlega fyrir samfylgdina á liðnum árum,“ segir að lokum í tilkynningunni frá Bjarna og Ruth.