Nú í júnímánuði munu þrír tónlistarmenn leggja land undir fót með tjaldvagn í eftirdragi og skottið fullt af hljóðfærum. Ætla þeir að heimsækja öll dvalar- og hjúkrunarheimili á Íslandi og spila fyrir heldri borgara landsins sem þar búa, aðstandendur þeirra og það góða fólk sem þar starfar. Verkefnið er framtak tónlistarfólksins og gefur það alla vinnu sína. „Tilgangurinn er að nota mátt tónlistarinnar til þess að sameinast, njóta og gleðjast og þannig sýna þeim þakklæti og virðingu í verki fyrir framlag þeirra til uppbyggingu á samfélaginu sem við búum í,“ segir Ása Berglind Hjálmarsdóttir ein þremenninganna. Hinir tveir eru Tómas Jónsson og Jökull Brynjarsson. Þau munu spila á hin ýmsu hljóðfæri og syngja. Einnig gefst tónleikagestum tækifæri á að spreyta sig í hljóðfæraleik því þau munu eins og áður sagði verða með fullt skott af hinum ýmsu hljóðfærum. Tónleikaferð þeirra hér um Vesturland hefst nk. laugardag (sjá nánar hér að neðan).