Norðurálsmótið 2014 hófst í dag á Akranesi. Fyrsti viðburður mótsins var skrúðganga sem knattspyrnuhetjur framtíðarinnar tóku þátt í ásamt fylgdarliði frá Ráðhúsi Akraness að Akraneshöllinni. Ungir Skagamenn leiddu gönguna og á eftir þeim gengu liðsmenn hina félaganna en mikil stemning var meðal mótsgesta. Voru drengirnir vel merktir sínum íþróttafélögum og allstaðar mátti heyra hvatningarhróp mismunandi liða. Norðurálsmótið var svo formlega sett í Akraneshöllinni af Ragnari Guðmundssyni, forstjóra Norðuráls. Norðurálsmótið er nú haldið á sama tíma og fyrirmyndir drengjanna etja kappi á heimsmeistaramótinu í Brasilíu. Sagði Ragnar að draumur Íslendinga um að komast á slíkt stórmót væri í sjónmáli. „Ef allir þessir efnilegu fótboltamenn halda áfram að æfa er alveg öruggt að Ísland er á leiðinni á HM í fótbolta í framtíðinni,“ sagði Ragnar við mikinn fögnuð viðstaddra. Gert er ráð fyrir að um þrjú til fjögur þúsund manns hafi tekið þátt í skrúðgöngunni og setningarathöfninni í dag.

Á mótinu í ár eru 26 félög skráð og eru keppendur frá þeim rúmlega 1200. Fyrstu leikir hófust klukkan 13 í dag og lýkur mótinu á sunnudaginn.