09. október. 2014 01:01
Sauðamessa var haldin í Borgarnesi á laugardaginn. Sem fyrr var boðið upp á glæsilega hátíðardagskrá tileinkaða íslensku sauðkindinni. Hátíðin hófst rétt eftir hádegi við Skallagrímsgarð þar sem flokkur kinda beið þess að verða rekinn í gegnum bæinn að sjálfu hátíðarsvæðinu sem að þessu sinni var í og við hús Menntaskóla Borgarfjarðar. Margt var um manninn á hátíðarsvæðinu og ýmis skemmtiatriði á útisviði auk þess sem boðið var upp á fría kjötsúpu í boði Raftanna, þá bestu sem blaðamaður hefur smakkað. Markaður var inni í skólahúsi MB. Um kvöldið var svo haldið heljarinnar ball í Hjálmakletti, sal Menntaskóla Borgarfjarðar. Þar lék hljómsveitin Made in Sveitin fyrir dansi og hélt uppi fjörinu langt fram á nótt.
Aðspurð segist Hlédís Sveinsdóttir framkvæmdastýra Sauðamessu í alla staði vera ánægð með hvernig hátíðin tóks, allt frá fyrsta dagskrárlið að morgni og fram til þess að síðasti gesturinn fór heim af ballinu um nóttina. „Það er auðmjúk sauðamessustýra sem hér talar. Ég er afslaplega þakklát því góða fólki sem lagði hönd á plóg við stórt og smátt til að hátíðin gengi sem best fyrir sig. Það eru einhvern veginn allir boðnir og búnir til að hjálpa til og það er svo frábært. Gestir voru til fyrirmyndir og mæting var frábær,“ segir Hlédís. Hún segir að veðrið hafi verið gott mestallan tímann, eða fram yfir kaffi á laugardeginum þegar tók að rigna í blárestina af dagskránni. Að öðru leyti hafi allt tekist eins og best verður á kosið.
Sjá fjölda mynda í Skessuhorni vikunnar.