10. október. 2014 09:22
Jafn og skemmtilegur leikur fór fram í íþróttahúsinu í Borgarnesi í gær þegar Skallagrímsmenn mættu Keflvíkingum í fyrstu umferð Dominosdeildarinnar. Fjölmargir áhorfendur voru á leiknum sem var hnífjafn lengst af og lokamínúturnar síðan æsispennandi. Jafnt var þegar mínúta var eftir af leiknum en Keflvíkingar reyndust sterkari á endasprettinum. Lokatölur voru 70:65. Keflvíkingar voru einu stigi yfir eftir fyrsta leikhluta, 19:18, en jafnt var í hálfleik 31:31. Skallagrímsmenn komust yfir um miðjan þriðja leikhluta en forskot þeirra varð þó ekki nema fjögur stig. Gestirnir jöfnuðu svo leikinn undir lok leikhlutans en þá var staðan 50:50. Keflvíkingar gerðu sig líklega til að slíta sig frá heimaliðinu í lokaleikhlutanum. Komust þá mest átta stigum yfir 59:51. Heimamenn bitu í skjaldarrendur og náðu að jafna 63:63 þegar tæp mínúta var eftir af leiknum. Stríðsgæfan var svo með Keflavíkingum í lokin og þeir uppskáru fimm stiga sigur, 65:70.
Skallagrímsmenn börðust vel í leiknum og voru ekki langt frá því að uppskera eins og þeir sáðu. Tracey Smith Jr. var manna öflugastur í liði heimamanna með 28 stig og 16 fráköst. Næstir komu Sigtryggur Arnar Björnsson með 14 stig, Páll Axel Vilbergsson með 10, Davíð Ásgeirsson 7 og þeir Ármann Örn Vilbergsson og Daði Berg Grétarsson með 3 hvor. Egill Egilsson lék ekki vegna meiðsla. Meiðsli hans eru þó ekki alvarleg og er búist við að hann verði með í næsta leik sem verður gegn Grindvíkingum syðra nk. fimmtudagskvöld.