10. október. 2014 01:34
Snæfellingar fengu nýliða Fjölnis í heimsókn í fyrstu umferð Dominosdeildarinnar í gærkveldi. Leikurinn var jafn framan af og ekki að sjá mikinn mun á liðunum. Það var svo í þriðja leikhluta sem Snæfell lagði grunn að góðum sigri og lokatölur urðu 84:65. Deildarkeppnin fer því vel af stað hjá Hólmurum sem hefur verið spáð frekar slöku gengi í deildinni í vetur af þjálfurum og fyrirliðum liðanna.
Leikurinn byrjaði með ágætum hraða og einkenndist af stuttum sóknum og hlaupum til baka. Heimamenn náðu strax góðu forskoti í fyrsta leikhluta, fóru úr stöðunni 9:8 í 21:8. Eftir fyrsta fjórðungs og staðan 21:15 fyrir Snæfell. Fjölnismenn héldu svo áfram að sækja í sig veðrið og tókst að minnka muninn í eitt stig, 29:28. Snæfellingar voru fastir fyrir og leiddu í hálfleik 36:31. Bandaríkjamaðurinn í liði Fjölnis hafði verið atkvæðamikill í leiknum en þegar Snæfellingar náðu að stoppa hann í byrjun seinni hálfleiks jókst munurinn á liðunum. Eftir tíu stiga áhlaup úr stöðunni 43:36 í 53:36 var ljóst að úrslitin voru ráðin. Snæfell bætti enn við og þótt gestirnir næðu að minnka muninn í tíu stig á kafla í stöðunni 71:61 var sigurinn aldrei í hættu.
William Nelson var með mjög góða skotnýtingu í liði Snæfells, með 70% í tveggja stiga skotum og 57% í þristum. Hann skoraði 30 stig í leiknum, tók 19 fráköst og átti 4 stoðsendingar. Austin Magnus Bracey skoraði 18 stig, Sigurður Þorvaldsson 13 og Pálmi Freyr Sigurgeirsson 13 hvor og Stefán Karel Torfason 10.
Næsti leikur Snæfells í Dominosdeildinni verður gegn Haukum í Stykkishólmi nk. fimmtudagskvöld.