Tæplega sex af hverjum tíu börnum og fullorðnum voru ekki með endurskinsmerki þegar tryggingafélagið VÍS kannaði stöðu þeirra mála við einn grunnskólann í Reykjavík í síðustu viku. Engu að síður var þetta skárra hlutfall en á sama tíma í fyrra þegar þrír af hverjum fjórum voru án endurskinsmerkja í könnun sem starfsmenn VÍS gerðu í gangbrautavörslu. Endurskin barnanna var oftast á töskum og utanyfirflíkum og þá fyrir tilstilli framleiðenda. Með endurskini sést viðkomandi allt að fimm sinnum fyrr en ella í myrkri. Sá tími getur skipt sköpum fyrir ökumann að bregðast við. Skessuhorn beinir þeim eindregnu tilmælum til foreldra og forráðamanna að næla eða líma endurskinsmerki á fatnað og skólatöskur barna sinna. Nú þegar skammdegið færist yfir og hálka eykst á götum og vegum er þetta aldrei mikilvægara. Bent er á að mörg tryggingafélög og bankar gefa endurskinsmerki.