Vegna umræðu um styttingu bótaréttar samkvæmt lögum nr. 54/2006 um atvinnuleysistryggingar vill Vinnumálastofnun taka fram að í fjárlagafrumvarpi ríkisstjórnarinnar sem lagt var fram í september síðastliðnum kom fram að stytta ætti rétt atvinnuleitenda til atvinnuleysistrygginga um sex mánuði. „Strax og frumvarpið kom fram ákvað Vinnumálatofnun að hafa samband við alla þá sem fyrirhuguð lagabreyting hefði áhrif á um áramótin, kynna þeim áhrif breytinganna og veita þeim aukna aðstoð og ráðgjöf. Öllum var boðið í viðtal til starfs- og námsráðgjafa þar sem farið var yfir stöðu mála með hverjum og einum, boðin aukin aðstoð við atvinnuleit og farið yfir hvaða vinnumarkaðsúrræði sem stofnunin hefur upp á að bjóða gæti helst komið viðkomandi að gagni,“ segir í tilkynningu.

Með vinnumarkaðsúrræðum er auk aðstoðar við atvinnuleit átt við einstaklingbundna ráðgjöf, námskeið eftir þörfum hvers og eins, störf með styrk til atvinnurekenda sem nemur andvirði grunnbóta eða framfærslu sveitarfélaga, starfsendurhæfingu o.fl. „Frá því að Vinnumálastofnun greip til þessara ráðstafana í september hafa yfir 150 einstaklingar, sem fengið höfðu greiddar atvinnuleysistryggingar í 30 mánuði eða lengur, fundið sér atvinnu eða önnur úrræði og farið af skrá Vinnumálastofnunar. Þjónusta Vinnumálastofnunar stendur öllum atvinnuleitendum til boða, óháð því hvort þeir eigi rétt til atvinnuleysisbóta eða hafi tæmt hann og hefur Vinnumálastofnun ítrekað það gagnvart þeim sem í hlut eiga,“ segir í tilkynningu VMS.